ଉଇକିପିଡ଼ିଆରେ ନୂଆମାନେ ଅନେକ ସମୟରେ କେଉଁଠି ସାହାଯ୍ୟ ପାଇଁ ପଚାରିବେ ତାହା ଜାଣିବାରେ ଅସୁବିଧାରେ ପଡ଼ନ୍ତି । ତାହା ଛଡ଼ା, ଅନେକ ସମୟରେ ସେମାନଙ୍କ କାମ/ଅବଦାନକୁ ଲୋକଲୋଚନକୁ ଆଣି ସେମାନଙ୍କ ପିଠି ଥାପୁଡ଼େଇଲେ ସେମାନଙ୍କର ମନବଳ ବଢ଼େ ଓ ସେମାନେ ଉଇକିରେ ଅଧିକରୁ ଅଧିକ କାମ କରିବା ପାଇଁ ଆଗଭର ହୋଇଥାନ୍ତି । ଏଥି ସହିତ ଏଥିରେ ନୂଆ-ପୁରୁଖା ସମ୍ପର୍କର ସେତୁଟିଏ ବି ଗଢ଼ି ଉଠେ ଓ ଭାବର ଆଦାନ ପ୍ରଦାନ ବି ଚାଲେ । ତେବେ ଏହି ନୂଆ ବିଭାଗରେ ନୂଆମାନେ ପୁରୁଖାମାନଙ୍କୁ ଭଳିକିଭଳି ପ୍ରଶ୍ନ ପଚାରି ପାରିବେ । ସେହିପରି ଆଳାପ ଆଲୋଚନା ମାଧ୍ୟମରେ ଏଠାରେ ପୁରୁଖାମାନେ ନୂଆମାନଙ୍କ ଅସୁବିଧାଗୁଡ଼ିକୁ ବୁଝି ସେସବୁର ପ୍ରତିକାର ପାଇଁ ନୂଆ ନୂଆ ଯୋଜନା ହାତକୁ ନେବେ । ଫଳରେ ଉଇକିପିଡ଼ିଆର ପରିସର ଅଧିକରୁ ଅଧିକ ଚଳଚଞ୍ଚଳ ହେବା ସାଙ୍ଗକୁ ନୂଆମାନଙ୍କୁ ଆହୁରି ଅଧିକ ସୁହାଇବ । ତେବେ ଓଡ଼ିଆ ଉଇକିପିଡ଼ିଆର ଏହି ନିଆରା ବିଭାଗଟିର ନାଁ 'ଉଇକିପିଡ଼ିଆ:ଚାହାଳି' ରଖିବା ପାଇଁ ପ୍ରସ୍ତାବ ଦେଲୁ । କାରଣ ଆଗକାଳରେ ଚାହାଳି ଥିଲା ଓଡ଼ିଶାର ସ୍କୁଲ । ଆଉ ଓଡ଼ିଆ ଶବ୍ଦ ଚାଟଶାଳିରୁ ଆସିଛି ଏହି ଚାହାଳି ଶବ୍ଦଟି । ଚାହଳି ଯେମିତି ଚାଟମାନଙ୍କ ପାଇଁ ଭଳିକିଭଳି ନୂଆପୁରୁଣା କଥା ଶିଖିବାର ଜାଗା ଥିଲା, ସେମିତି ଉଇକିପିଡ଼ିଆ ଚାହାଳି ଏଠାରେ କାମ କରୁଥିବା/ କରିବାକୁ ଚାହୁଁଥିବା ନୂଆ ଉଇକିଆଳିମାନଙ୍କ ପାଇଁ ଶିଖିବାର ଭଲ ଜାଗାଟିଏ ପାଲଟିବ । ଏହା ଉଇକିପିଡ଼ିଆ:ଆଲୋଚନା ସଭାରୁ କିପରି ଅଲଗା ହେବ? ଏଥିରେ କେବଳ ନୂଆ-ପୁରୁଖା ସମ୍ପର୍କ ଗଢ଼ି ଉଠିବା ସାଙ୍ଗକୁ ସେମାନଙ୍କ ଭିତରେ ଆଲୋଚନା ବି ଚାଲିବ ଅସୁବିଧା ଓ ତାହାର ସୁଧାର ବାବଦରେ । ବାକି ଆଲୋଚନା ଯେତକ, ସେସବୁ ଆଲୋଚନା ସଭାରେ ହିଁ ହେବ । ପ୍ରସ୍ତାବିତ ନାମ:: 'ଚାହାଳି' -- ସଁବି ମହାତ _______________________________________________ Wikipedia-OR mailing list Wikipedia-OR(a)lists.wikimedia.org https://lists.wikimedia.org/mailman/listinfo/wikipedia-or